Kategori: Nyhende

Dette er statistikken over alle spelarane som har spelt for Førde sitt A-lag herrar dei siste 20 åra. Og på toppen tronar sjølvsagt Eirik Flatjord med imponerande 361 obligatoriske kampar. Det er her snakk om 2., 3. og 4. divisjon.

Heilt sidan Eirik Flatjord fekk sin debut på Førde sitt A-lag i 2006, har forsvarsspelaren spelt så godt som alle kampar gjennom sesongane. Sjå berre på denne rekka av kampar som den fotrappe og gjennomtrente Eirik Flatjord har spelt: 15-21-25-24-26-18-26-26-16-24-25-24-23-21-10-20-17. Til saman 17 sesongar så langt, og mest sannsynleg går han på ein ny sesong med moderklubben.

PS: Det er verdt å merke seg at den sesongen med ti kampar (2021), så skuldast det at A-laget til Førde berre spelte ti kampar grunna korona-pandemien.

Mange på lista

Bak Eirik Flatjord er det eit sprang tilbake til Kai Kilnes som stoppa opp på 290 kampar, medan veterantrioen Gisle Isene, Thor Jørgen Spurkeland og Pål Arve Myklebust stoppa opp på høvesvis 206, 203 og 200 kampar.

Det er Marius Storevik, den yngste sonen til dagleg leiar Per Øyvind Storevik, som har ført statistikken fram til dags dato. Det heile starta med at han hadde utplassering i Førde il Fotball på ungdomsskulen, og seinare har han møysommeleg ført inn alle kamptroppene til Førde. På same viset har han henta fram tal frå både Firda sine kampstatistikkar og Norges Fotballforbund sine oversikter.

Sjekk desse

Dette er spelarane som har meir enn 90 kampar for Førde i denne perioden:

Terje Sørbø                       192 kampar

Kai Vidar Nygård              177     «

Bernt Norevik                   169      «

Øystein Vetti                     154      «

Benny Rivedal                  154      «

Ruben Holsæter               145      «

Ole Henrik Gulliksen       144      «

Vegard Savland                142     «

Alexander Ødegaard       132      «

Tore Evensen                   131     «

Vegar Gjermundstad       126      «

Kim Tangedal                    123     «

Sander Solvik                    120      «

Henrik Hagen                    114      «

Erlend Moen Taule          114      «

Kristoffer H. Iversen        112      «

Fredrik Hanssen               111      «

Vegard Skjeldestad          106      «

Daniel Kvalvågnes           102     «

Steinar Tenden                 99        «

Stein Erik Solheim           96       «

Eirik Fraas                        95      «

Mathias Sagevik              92        «

Thor Erik Nygård             90        «

Skulle det vere ønske om komplett liste, så får vi komme tilbake til den.

Det er totalt 183 spelarar som har spelt for Førde i alle desse åra.

Tekst og foto: Stig Roger Eide

Førde kan få ein spelar med i sluttspelet i EM til sommaren. Elias Grimeland spelte to av kampane då det norske G16-landslaget denne veka kvalifiserte seg til eliterunden til EM etter ei turnering i Romania.

Elias Grimeland kom rett heim frå turneringa i Bucuresti i Romania seint onsdag kveld, og reiste rett til naturfagprøve på Førde vidaregåande skule torsdag morgon.

-No skal det bli godt å ta litt pause frå fotballen ei stund. Det einaste eg veit no er at eg skal spele KM-innandørs i Førdehuset om vel ei veke, smiler 16-åringen då han møter Førdepatrioten sin utsende heime.

Til EM

For faktum er at Elias Grimeland i løpet av den siste veka har fått bokført to nye landskampar på sin CV. Mot Romania spelte han det siste kvarteret i 0-0-kampen, medan han spelte heile oppgjeret mot Estland då laga spelte 2-2 på det rumenske nasjonalanlegget i Bucuresti.

-I den siste og avgjerande kampen mot Frankrike vart eg sittande på benken i heile oppgjeret. Då la vi for første gang om til fem mann i forsvaret, og gjennomførte ein prikkfri forsvarskamp mot dei franske favorittane. Med uavgjort der, er vi klare for eliterunden til neste år, seier venstrefotaren og er svært glad for den positive utviklinga han har hatt i det siste.

Tillit

-Det starta med at eg fekk mykje tillit på Førde sitt A-lag under trenar Knut Erik Folland. Så kom landslagsuttaket etter det, og eg føler at landslagstrenar Bjørn «Bommen» Johansen også har gjeve meg mykje tillit, seier venstrebacken og håpar sjølvsagt at han er med i framtidige landslagstropper for Norge.

-Eg trur det skal vere ei turnering i vinter, før vi skal ut i eliterunden til EM. No er det visstnok 32 nasjonar som er klare, og dette talet skal ned til 16, trur eg. Men korleis dette skjer, og kor kampane skal bli spelte veit vi ikkje noko om enda, seier 16-åringen og vedgår at han no i tida som kjem vil ha fokus på skulegang.

Fokus på skule

-I følgje dei andre elevane i klassen, så har eg visstnok ikkje gått glipp av så mykje den siste veka. Men eg trur eg må vise litt meir interesse for skulen no når fotballsesongen er over. Og eg kjenner at det også skal gjere godt for kroppen, seier Elias som er ein av spelarane i Førde som har spelt flest kampar i år.

-Ja, det har blitt mange, men eg har ikkje talet. Men det er sikkert nok. Så no er det viktig å restituere seg, og i tida framover er det planlagt berre to treningsøkter i veka med A-laget til Førde. Eg trur det er nok, ja, smiler Elias Grimeland.

Tekst og foto: Stig Roger Eide

– Vi er klare for eit av dei største kulturarrangementa i Førde gjennom året, fortel ein engasjert leiar for Førde IL, Per Øivind Storevik. Det er 26. året ein ivrig dugnadsgjeng og dyktige Førdefolk husar fotballspelarar, støtteapparat og foreldre på Førdecup. Arrangørane fortel at i år er det rekordmange påmeldte. Dei kunne ikkje hatt fleire lag sjølv om dei ville. Det blir over 2 000 menneske tilknytt cupen denne helga med 138 påmeldte lag. – Det er stor happening for alle som er med! Lag frå Ålesund til Bergen er representert, og det blir fult køyr heile helga, fortel Per Øyvind.

Meir enn å sparke ball
– Klart det er viktig med dei minuttane ein har på bana. Laga bruker gjerne cupen som ein god avslutning på sesongen. Men samtidig er det sosiale kanskje det viktigaste. No samlast fotballglade ungdommar og får nye vener, og det er kjekt å legge til rette for dette, fortsett han.

Foto: Collage frå tidlegare år med Førde Cup.

Navet i Førdecupen
Det er ikkje få personar som er med å gjere cupen det den er. Mange foreldre og dugnadssjeler er i sving denne helga. Alle har kvar sine ansvarsområde, og skal vi tru Per Øivind er det litt av ein logistikk som skal sitte. Alt frå sekretariat, dommarar, kampoppsett, mat, rydding, rigging og overnatting må vere på plass. Heldigvis har dei gjort det før, og med ein dyktig dugnadsgjeng som ikkje er redd for å ta ansvar går det saumlaust. – Denne helga er det «døgnet-rundt» dugnad, og eg er glad for at mange stillar opp. Dei gjer ein kjempejobb, skryt leiaren.

Heile Førde i sving
Dei Vidaregåande skulane i området tas i bruk, og husar kring 700 personar. Resten overnattar på hotella eller andre stader. I tillegg er godt samarbeid med Sunnfjord Kommune og Førdehuset avgjerande. Heile Førde er med andre ord i sving når så mange tilreisande kjem på besøk. 

Den nye leiaren for cupen har kontroll
I år tok Tone Lin Støfring Skovro over stafettpinnen frå Odd Hagen. No leiar ho det overordna, og skal sørge for at den står til alle sine forventningar. Ho trekk fram den dugnadsånda som finns hos både lag og føresette er heilt enorm. Saman ser det ut som det blir nok eit strålande arrangement i Førdehuset. No ønsker ho alle hjarteleg velkommen til underhaldande fotball både fredag, laurdag og søndag!

Her kan du finne oversikt over lag og kva bane og tid dei spelar på:
https://www.profixio.com/app/forde-cup-innandors-2023

Sjekk desse 11 frivillige. Onsdag ettermiddag og kveld vaska dei ned minst 5000 kvadratmeter på Hafstad vidaregåande skule, slik at 550 fotballspelarar i Førde Cup skal komme til reine rom.

-Det er litt av ein jobb som ventar oss. Vi skal vaske ned 26 toalett, 22 klasserom, fire store fellesrom og ikkje minst mykje fellesareal. Men det skal vi klare i løpet av kvelden, fastslo overnattingssjefen i årets Førde Cup, Øystein Fosstvedt.

Rekord i overnatting

Faktum er nemleg at Hafstad vidaregåande skule har stått tom sidan nyeskulen på Øyrane vart teke i bruk i august, og det er dermed trong for å vaske med tanke på innrykket som kjem fredag ettermiddag.

-Det er midt i blinken og heilt fantastisk at vi kan få plass til heile 550 personar her på Hafstad vgs. Når vi dessutan skal ha folk på overnatting på Førde ungdomsskule, så vil vi i år sette rekord med over 800 personar til overnatting på to skular. Og alle har gangavstand til Førdehuset, seier Fosstvedt og deler ut vaskeutstyr som moppar, kluter, toalettpapir, vaskemiddel, bøtter og anna til dugnadsgjengen. Dessutan skal vindauga i fleire av romma tildekkast med papir for å hindre innsyn.

Dugnadsløft

-Her på Hafstad vgs skal vi sjølvsagt ha minst to vakter døgnet rundt. Og etter at turneringa er ferdig utover sundagen, så startar nedvaskinga. Den er sjølvsagt også på dugnad. Men då er det ikkje denne gjengen som skal i elden. For i samband med årets Førde cup er det totalt eit par hundre foreldre og andre i Førde-samfunnet som stiller opp på dugnad under Førde cup, fortel Fosstvedt og legg til:

-No håpar vi berre at Førde-folk tek turen i Førdehuset og ser mylderet av glade ungdommar, seier han.

På bildet ser vi foreldregruppa frå G13 og G14-laga som har ansvaret for nedvaskinga på Hafstad vidaregåande skule. Frå venstre Øystein Fosstvedt, Bente Herland Aase, Kjersti Lundekvam Hoff, Liv Reidun Bergseth, Geir Angedal, Jannicke Hoff Strand, Paul Christian Sandal, Roger Strand, Runar Torsheim, Anne Grethe Kleiva og Thomas Tordal.

Dette er kort og godt fantastisk!!!

Tekst og foto: Stig Roger Eide

Elias Grimeland fekk måndag ettermiddag gladmeldinga han hadde drøymt om. No ventar EM-kvalifisering for G16-landslaget for venstrebacken på 3. divisjonslaget til Førde.

Jubelropa frå den avgjerande 3. divisjonskampen til Førde hadde knapt nok stilna av i øyra til Elias Grimeland, før det kom gladmelding frå Norges Fotballforbund: Han er nemleg med i troppen til landslagstrenar Bjørn Johansen som skal møte Romania, Estland og Frankrike i Romania om kort tid. I perioden 11. til 22.november skal nemleg det norske G16-landslaget vere i Romania for å spele tre viktige kvalifiseringskampar for å bli klare til G17-EM. Denne meisterskapen vert spelt på Kypros i perioden 20. mai til 5. juni neste år.

Dette er spelarane som Norges Fotballforbund har registrert til EM-kvaliken (NB: Legg merke til klubbane som desse spelarane representerer):

Mathias Engevik Klausen – Brann
Isak Jønvik Holmen – Rosenborg 
Teo Emanuel Hindenes Ingilæ – Bodø/Glimt 
Filip Jensen Riise – Stabæk
Jesper Nerhus Eikrem – Brann 
Jonathan Vonheim Norbye – RB Leipzig
Sebastian Olderheim – Stabæk 
Joachim Prent Eckbo – KFUM
Markus Lennart Seim-Monsen – Nordsjælland
Isak Sjong – Bodø/Glimt
Daniel Skaarud – Lillestrøm 
Håkon Singsdal Volden – Rosenborg
Oskar Spiten Nysæter – Stabæk
Even Caspersen Knudsen – Lillestrøm 
Elias Grimeland – Førde 
David Steinegger – Brann 
Mikkel W.Linnbæck – Skeid
Lucas Svenningsen – Ull/Kisa
Sean Lucian Nilsen-Modebe – Ull/Kisa 
Felix Taraldset – Viking

Bilde: Elias Grimeland går frå spel for Førde i 3. divisjon til spel for det norske G16-landslaget. Bildet er frå oppgjeret mot Elverum sundag ettermiddag.

Tekst og foto: Stig Roger Eide

Førde klarte oppgåva i siste kamp. Elverum vart regelrett kjempa i senk, og Jacob Bergset si scoring i det 4. minutt vart ståande som avgjerande. Ikkje rart at tilskodarane storma bana etterpå. Førde spelar i 3. divisjon også neste år!

Dert var ekstatiske scener i sluttminutta i årets siste seriekamp i Norsk Tipping-ligaen. Førde-spelarane kjempa som løver og brukte alle metodar for å halde Elverum på avstand. Så når dommar Yngve Håkonssen endeleg blåste av kampen, storma tilskodarane bana og omfamna Førde-spelarane.

Ellevilt

-Dette er så fantastisk. Og så fortent. Det denne gjengen her har gjort det siste halve året fortener absolutt fornya tillit i 3. divisjon. Tenke seg til at vi avgjer dette sjølv, og ikkje treng hjelp av nokon andre, strålar trenar Knut Erik Foland og går smilande rundt og tek alle i handa.

-No er det fritt fram for ein fest gutar. Reknar med at arbeidsgjevarane har forståing for det etter ei slik bragd, smiler Folland då han gratulerer spelarane i garderoben etter 1-0-kampen.

Straffe!

For det vart med Jacob Bergset si straffescoring i det 4. minutt. Høyanger-guten vart sjølv sparka ned innanfor 16-meteren, og assistentdommar Petja Cink gav melding til hovuddommar Yngve Håkonssen om at det var straffe. Noko som var udiskutabelt for alle som stod i nærleiken av tacklinga. Jacob Bergset var sikker frå 11-meteren, og gav dermed heimelaget eit viktig psykologisk overtak frå starten av.

Riktignok styrte Elverum banespelet dei første 45 minutta, men i 2. omgang var det faktisk Førde som skapte dei fleste målsjansane. Det var tydeleg at denne leiinga ville ikkje Førde-spelarane gje frå seg, og det vart kjempa som løver i alle duellar. Og då resultata frå dei andre kampane tikka inn, og gjekk i Førde sin favør, så hadde heimelaget eigentleg ikkje trong for dagens trepoengar.

Glad Folland

-Men vi avgjorde det sjølv. Det er det viktigaste. Spelarane viser moral som er heilt fantastisk. Ikkje rart at tilskodarane stormar bana for å takke spelarane for innsatsen. Så sjølv om det var kaldt i Hafstadparken i dag, så varma verkeleg spelarane alle hjarte, smiler Folland og vert takka for kampen av Elverum-leiinga.

-Det var fortent at Førde overlever i divisjonen. Dette er ein flott klubb, og vi kjem gjerne igjen hit neste år, sa hovudtrenar Stian Aasen på veg ut i spelarbussen.

Førde il Fotball kjem med masse meir stoff utover denne festdagen.

Tekst og foto: Stig Roger Eide

-Det er fantastisk flott at vi har eiga jentegruppe på Akademiet vårt, seier Bjørn Totland under treningar med dei mest aktive i Førde il Fotball.

Gjennom veka er godt 100 utøvarar i alderen ni til 12 år deltakarar på Førde-akademiet. Gutegruppene er inndelt i årskull, men for jentene er det samla spelarar i heile aldersspennet.

Tøffe jenter

-Det betyr sjølv at vi har nokre tøffe jenter i niårsalderen som er saman med 12-åringane. Men det er noko dei vekse på, og som vi tek omstyn til, seier Totkland og ser at for første gang i hans tid i Førde-fotballen, så er det ei rein jentegruppe. Og som dessutan har eigne kvinnelege trenarar.

-Totalt har vi innpå 35 deltakarar, men i dag er vi 24 spelarar. Det skuldast at nokre kan vere sjuke, og nokre driv med alternative treningar akkurat i dag, seier Totland og ser dei tre damespelarane Viktoria Zablotna, Frida Skilbrei og Marit Hjelmeland Berqvam startar oppvarminga med akademi-jentene.

A-laget kjem også

-Dette er framtida til Førde il Fotball, og det er viktig at vi gjev dei så gode økter som mogleg. Noko vi legg stor vekt gjennom skulering av trenarkorpset vårt. Og om ei god veke har vi utfordra A-laget til herrane om å ta akademi-treningane laurdag 4. november. Noko eg er sikker på vil vere populært, seier Totland medan dei 24 jentene på bildet er i full aktivitet på bane 2 i Hafstadparken.

-Til og med veke 49 skal vi ha treningane i Hafstadparken. Dessutan har vi fått tildelt to treningstimar inne i Førdehuset som vi vil rullere mellom gruppene, seier Bjørn Totland til Førdepatrioten sin utsende tysdag ettermiddag.

Tekst og foto: Stig Roger Eide

Innandørscupen i Førdehuset 10. til 12. november når nye høgder. -Vi kunne hatt 160 lag på plass, men har sett stopp då vi ikkje har plass til meir enn 138, seier Geir Vindheim som er ansvarleg for kampoppsettet i den tradisjonsrike turneringa.

Når eit stort frivillegkorps av foreldre og andre i Førde il Fotball tek mot delatakar-laga fredag 10. november, vil heile Førde bli prega av at at det er minst 2000 gjester i byen. I tillegg til at dei fleste hotellromma er okkuperte av tilreisande fotballspelarar, vil om lag 800 personar overnatte i klasserom på anten Hafstad vidaregåande skule eller Førde Ungdomsskule.

-Vi har totalt 800 overnattingsgjestar og det er soleklar ny rekord for Førde cup. Heile 84 av laga skal ha denne typen overnatting. Det flotte er at vi får nytte to skular i gangavstand frå Førdehuset, som gjer arrangementet kompakt. Noko som eg trur gjer at Førde Cup er såpass attraktiv, seier Øystein Fosstvedt som er ansvarleg for skule-overnattinga.

På venteliste

Totalt vil 138 lag delta i årets Førde Cup og Geir Vindheim, som er ansvarleg for kampoppsettet, seier at dei har åtte lag på venteliste.

-Vi hadde totalt 151 påmelde, og kunne garantert ha hatt 160 lag til årets Førde Cup. Men vi har kort og godt ikkje kapasitet til fleire enn 138 deltakarlag. No er vi heilt på grensa. For å kunne gjennomføre årets Førde Cup må vi dessutan ta i bruk hallen på Halbrend til nokre kampar laurdag og sundag. Det gjev litt større fleksibilitet ved Førdehuset, men har det minuset at nokre av laga må spele ein av kampane sine på Halbrend. Noko som medfører noko transport-utfordringar, seier Vindheim om den enorme deltakinga av lag frå Møre og Romsdal, samt Vestland.

Mykje mat

Med så mange tilreisande, er det også mange munnar som skal mettast. Og leiar for matserveringa, Anita Solsvik, seier at det er venta 600 til tacomiddag fredag kveld.

-Saman med Martin Haug på Coop-kafeen skal vi servere lasagne, og pølse med stappe, på laurdag til hundrevis av svoltne spelarar/lagleiarar. På sundagen oppfordrar vi laga til å smørje seg nistepakke, og det vil ikkje vere felles middag då. Først og fremst for å redusere matsvinnet som oppstår då mange reiser tidleg då dei blir slått ut av turneringa, seier Solsvik som også har mange års erfaring på Førde Cup.

Ny leiar

-Dette er 26. året vi arrangerer Førde Cup, og det er etablert gode erfaringar i denne gjengen. Ikkje minst er den frivillege innsatsen frå svært mange foreldre i klubben heilt unik. Vi treng folk på rydding, rigging, vakter både i Førdehuset og på skulane, sekretariat, matlaging etc, etc. Dette blir ei helg med fotball døgnet rundt for dei fleste av oss. Kampane startar 08.00 om morgonen og på laurdagskevlden er dei ikkje ferdige før 23.00. Den siste finalen blir ikkje ferdig før 18.00 på sundag. Det trengt då mange skal reise innpå fire timar etter at kampane er ferdige, seier turneringsleiar Tone Lin Støfring Skovro.

På bildet ser vi leiarane i Førde il Fotball som ser fram til årets Førde Cup med rekorddeltaking. Frå venstre: Geir Vindheim, Tone Lin Støfring Skovro, Simo Koskinen, Per Øyvind Storevik, Anita Solsvik, Odd H. Hagen og Øystein Fosstvedt. Dommaransvarleg Bjørn Egil Sunde var ikkje med på møtet.

Tekst og foto: Stig Roger Eide

Sjekk desse gutane. For tredje året på rad har dei vunne Adidas Cup. -Dette er ei fantastisk gruppe, seier trenar Ørjan Vikum.

Førde sitt G16-lag fornekta seg ikkje under helgas finalehelg på Gjøvik. Dei vann igjen denne landsomfattande turneringa som har status som uoffisielt NM. I 2021 vann dei som G14, i fjor som G15 og i år som G16.

Tre på rad

-Dette er ei vanvittig bra gruppe. Vi hadde utfordringar under semifinalen mot Kongsberg laurdag. Det var eigentleg den moralske finalen. Likevel klarte vi å avgjere kampen til vår fordel med 3-2-siger. Då forstod eg at det kunne bli ein ny siger i denne turneringa, seier Ørjan Vikum som har vore trenar for denne suksessfylte gjengen i to sesongar. I fjor var det Lars Ove Nistad som hadde laget.

-No er vi historiske med tre sigrar på rad i Adidas Cupen. Vi har tangert Fyllingsdalen sin prestasjon for 12-13 år sidan. Dette står det verkeleg respekt av, seier Førde-trenaren etter at gullmedaljane er heng rundt halsen på spelarane på Vind stadion i Gjøvik.

Sliesiger i finalen

I finalen mot bergensklubben Fana sundag føremiddag vart det også ein slitesiger til Førde, fortel Ørjan Vikum.

-Vi fekk ei leiing i 1. omgang ved Liam Bruflot Undeland, og det vart uhyre spennande gjennom heile den siste omgangen. Men det er klart at når Elias Grimeland kom rett frå landslagssamling i England til finalekampen, så skapte han meir ro i gruppa defensivt. Og vi klarte å ri i land ein fortent 1-0-siger. Dessutan spelte både Liam Bruflot Undeland og Vegard Otterlei Fløholm svært godt i finalen. Og for tredje året på rad, så vart ein Førde-spelar kåra til turneringas beste, nemleg Vegard Lorgen. Han vann også for to år sidan, medan det var Teodor Aamot som fekk denne statusen i fjor, fortel Ørjan Vikum og må fullrose heile støtte-apparatet rundt laget.

-Og ikkje minst dei entusiastiske foreldra i denne gruppa. Dette samhaldet som er skapt er nok ein av suksessfaktorane, ja, seier Førde-trenaren.

Desse skal rosast

Dette er spelarane på G16-laget som har vore med på finalehelga i Gjøvik, og som har vunne Adidas Cup for tredje året på rad: Ruben Jordanger, Miguel Grønl Garfors, Kasper Haaland Fureli, Marius Øksenberg, Noah Øren Otternes, Thomas Sunde, Daniel Gjelsvik, Vegard Lorgen, Sondre Løland, Håvard Vik Søvde, Aron Zerai Okbanderias, Matias Sæterdal Steen, Liam Bruflot Undeland, Emil Frøysland, Vegard Otterlei Fløholm, Elias Myrland, Elias Grimeland og Sander Lekva.

Støtte-apparatet består av Ørjan Vikum, Kariann Husevåg Løland, Ole Bjørn Otternes og Kay Lorgen. Samt ei rad entusiastiske foreldre!

Tekst: Stig Roger Eide. Foto: Kariann Husevåg Løland