Forfatter: Stig Roger Eide

Berre timar før Kaja Johannesen Skrede og Kristina Hjelmeland Berqvam skulle spele damekamp for Førde, fekk dei mail om at begge var uttekne til landslagsamling for J15-landslaget.

-Eg trudde hjartet mitt stoppa i minst ti sekund. Eg Facetima til pappa, og eg trur også at han var litt rørt. Det såg iallfall slik ut, ler Kaja Johannessen Skrede då Førde-patrioten tek ein prat etter at landslagsuttaket kom seint fredag ettermiddag.

Til Porsgrunn

Faktum er at Førde il Fotball har fått med to spelarar til landslagsamlinga i Porsgrunn i perioden 19. til 23. juni. Og bortsett frå Førde er det berre ein spelar til frå Vestland, nemleg ei jente frå Stord.

-Dette var utruleg kjekt og overraskande. Vi leverte begge to sikkert nokre gode kampar under samlinga vi hadde med regionlaget i Trondheim for litt over ein månad sidan. Det er sikkert det som var utslagsgjevande, seier Kristina Hjelmeland Berqvam og såg at tvillingsøstra Inga ikkje kom med denne gongen.

-Det hadde jo vore enda kjekkare viss vi hadde fått plass alle tre. Men Inga var jo på denne samlinga i fjor som 14-åring, så ho veit kva som skjer. Og eg trur ikkje det er så mykje som skil oss, seier Kristina og trøystar på den måten tvillingssøstra.

Gratulasjonar

-No må vi berre vise at vi har gjort oss fortent til dette. Allereie i kveld må vi få dette ut av tankane når vi skal møte Sogndal på Fosshaugane Campus, seier Kaja og ser at den eine etter den andre av lagvenninnene kjem bort for å gratulere med uttaket.

Noko damelaget sin trenar Johan Pettersen også set stor pris på.

-Dette er fantastisk, både for jentene sjølv, for laget og for klubben. Det viser at det lønar seg å jobbe i form av mengder med treningar i Hafstadparken og på PULS. Dette er utruleg motiverande for oss alle, og viser at det er ikkje langt opp til landslaget for mange av desse spelarane, seier Johan Pettersen og ser dei to «ferske» landslagsspelarane smile frå øyre til øyre.

-Dette var ei skikkeleg gladmelding, og det er ikkje noko problem om at dette går til hovudet på desse to akkurat no. Men når kampen mot Sogndal begynner i kveld klokka 19.00, så er dei garantert på hugget slik dei brukar å vere, seier hovudtrenaren.

Førde il Fotball gratulerer med landslagsuttaket til Kaja og Kristina!!

Tekst og foto: Stig Roger Eide

I 80 minutt var det håp om ei cupbombe i Førde. Då var stillinga framleis 1-1 og heimelaget skapte mange målsjansar. – Fram til då var det bra. Så blir vi slitne, seier Førde-trenar Terje Rognsø etter 1-3-tapet mot Sogndal.

Sogndal har framleis grepet på Førde, men trengte nesten to omgangar før dei fekk skikkeleg has på heimelaget. Det stod 1-1 etter 1. omgang, men då hadde det ikkje vore ufortent om Førde faktisk hadde leia.

-Ja, vi spelar ein god 1. omgang, og skapar truleg fleire målsjansar enn Sogndal. Mellom anna hadde Kristian Hauståker eit skot som går i tverrliggaren og ned på streken. Men slik er det ofte, seier Rognsø og såg at Sogndal bytte seg opp i mannskapet utover i 2. omgang.

Bølgja fram

-Då blir vi slitne og maktar ikkje å halde på ballen. Kampplanen var at vi skulle komme inn i bakrom, men vi lukkast ikkje med det. Dermed kom det bølgje på bølgje med Sogndal-angrep, seier Rognsø og såg at Sogndal gjekk opp i 1-2 på ein heller tvilsam  måte.

-Det vert snakka om at det var offside, og at det ikkje var noko straffe då tacklinga var på ball. Men det er no ein gong dommaren som avgjer slikt, seier Rognsø og såg at Florø-dommaren Sivert Orheim peikte ubønnhørleg på 11-meteren. Som Alejandro Diaz ekspederte i mål og vart tomålsscorar.

Herleg innsats

-I slike kampar mot ein alltid ha marginane med seg. I dag vippa det nok ein gong Sogndal sin veg. Og etter 90 minutt er det nok fortent, seier Rognsø og vert støtta av Sogndal-spelaren Endre Kupen.

-Endeleg siger på Førde stadion. Det er ei stund sidan. Eg må sikkert tilbake til den tida eg spelte for Florø, gliser Kupen og vedgår at han likar seg betre på jamnt underlag.

-Endeleg bra at det hadde regna og at ballen fekk litt fart. Men det er uvant at ballen humpar slik. Men heldigvis gjekk det vår veg i dag, gliser Kupen og dultar gamletrenaren Terje Rognsø i sida på veg inn i garderoben.

Dermed er cupeventyret over for Førde, medan Sogndal nok ein gong er klar for 2. runde. Med Fjøra sin siger over Florø er det dermed to sogndalslag som er vidare til neste runde i årets NM-cup.

På bildet takkar Rognsø Tore André Flo for kampen.

Kjem meir frå kampen litt seinare.

Tekst og foto: Stig Roger Eide

Dei siste 45 minutta var eit stormløp mot Florø-forsvaret, men to minutt på overtid fekk den fotrappe Kristoffer Ryland den bakromsballen han hadde venta på. Dermed var det Florø-spelarane som kunne slippe jubelen laus.

Fotball er ikkje alltid like rettferdig viss ein ser på banespelet, men Førde-trenar Terje Rognsø forklarar 1-2-tapet mot Florø slik.

-Sjølv om vi køyrer heile 2. omgang, så blir vi for upresise i det siste trekket. Vi dominerer fullstendig, men skapar likevel ikkje dei heilt store målsjansane. Eg skjønnar kort og godt ikkje kvifor vi spelar slik vi gjer. Det verkar som om vi ikkje stoler på eigne ferdigheiter, seier Rognsø etter at hans tidlegare elev, Kristoffer Ryland, har heldt kaldt vatn i heimelaget sitt blod med si andre scoring for dagen.

I kvar ende

Det første målet til Ryland kom føre publikum var komme inn på stadion, og det siste kom nokre minutt på overtid.

-Vi snakka om det i pausen at det ville komme nokre bakromsballar som vi ville kunne utnytte. Og at den først kom nokre minutt på overtid, er heilt greitt for meg, smiler Ryland som gjorde comeback for Florø for ei veke sidan. Dei siste åra har han spelt 5.divisjonsfotball i Bergen, etter at han la opp etter ein skade han fekk i Florø då laget var oppe i OBOS-ligaen.

Heimebane

-Det er ekstra kjekt å slå Førde i Førde. Dette er tredje gong eg er med å vinne her inne, og det følest nesten som heimebane for meg. No skal vi iallfall feire at Florø by også har bursdag i dag, smiler Ryland og blir omfamna av Florø-supporterar som stormar bana etter kampslutt.

Førde sitt trøystemål kom på eit omdiskutert straffespark mot slutten av 1. omgang, og det var Jacob Bergset som scora sitt sjette mål for sesongen.

-No må vi grave djupt dei komande dagane, og reise oss så fort som råd. Vi gjer mykje bra i periodar, men manglar det siste. Og viktigaste. Nemleg det å putte ballen i mål. No er det OBOS-liga-laget Sogndal som er neste motstandar på Førde stadion. Den kampen går 24. mai, avsluttar Rognsø og går saman med skuffa Førde-spelarar ned i garderoben.

PS: Det kjem meir om fotballfesten på Førde stadion litt seinare. Ikkje minst masse bildestoff.

Tekst og foto: Stig Roger Eide

Utan Vegard Savland og Sander Aamelfot på bana, er det midtbanespelar Jacob Bergset som scorar Førde sin mål. Men på Fosshaugane Campus var ikkje to scoringar av Jacob nok til å tukte Endre Kupen og Sogndal.

-Jacob er god, ja. Det veit vi. Men det held ikkje berre med ein spelar, er Førde-trenar Terje Rognsø sin kjappe kommentar etter 3-2-tapet mot Sogndal sine neste beste. Så i staden for at Førde no kunne kople seg på i det øvre sjikt i 3. divisjon, så ligg dei på nedre halvdel av tabellen.

Avslørt

-I dag blir vi avslørt på ferdigheiter. Kort og godt. Dette er ikkje noko nytt. Vi veit kva nivå vi ligg på, men når eg ser den første halvdelen av 2. omgang i dag, så er det truleg det svakaste eg har sett av Førde på åresvis, seier Rognsø og såg at 0-1-leiinga då vart snudd til 3-1. Først og fremst gjennom gode overgangar frå Sogndal og ditto avslutningar av den tidlegare Florø-spelaren Endre Kupen.

-Vi veit kva Kupen kan, og når du får stå åleine innafor 16-meteren, så brukar han å score, seier Rognsø og siktar til at Førde defensivt ikkje heng saman i 2. omgang.

Skader og sjukdom

-Det er greitt nok at vi ikkje rekk å sette innpå ein spelar etter at Elias Rognebakke vart skadd log Sogndal utnyttar det med å score sitt første mål. Men at vi ikkje får kontroll etterpå er vanskeleg å forstå. Nei, dette var ein sur lærepenge, seier Rognsø og ser at utan Vegard Savland (sjuk), Sander Aamelfot (skada), Mathias Sagevik (skada), Simen Indrebø (skada), så er det tynt med offensive spelarar i troppen.

– Dette er noko vi har vore klar over ei stund, men det er ikkje gjort over natta å endre på slikt. No får vi ta oppteljing, og håpe at nokre av desse snart kan vere i aktivitet igjen. Og vi har ikkje god tid. Allereie på laurdag er det heimekamp mot Volda, seier Rognsø etter tapet mot Sogndal sine neste beste.

Tekst og arkivfoto: Stig Roger Eide

SOGNDAL II-FØRDE 3-2 (0-1)

Fosshaugane campus

200 tilskodarar

Mål:

0-1 37 min Jacob Bergset

1-1 57 min Johannes Konstali-Lødemel

2-1 63 min Endre Kupen

3-1 76 min Endre Kupen

3-2 84 min Jacob Bergset

Dommar: Sivert Orheim, Florø

Gult kort: Kristoffer Haukås Steinset, Marius Årøy og Jørgen Johnsen, alle Sogndal II. Nikolai Hvidsten, Førde

Førde: Fredrik Hanssen, Eirik Flatjord (Sander Lekva i 72 min), Ole Petter H. Larsen, Elias Rognebakke (Henrik Lilleaasen i 59. min), Øystein Østvik, Kristian Hauståker, Jacob Bergset, Peter Aase (Nicolai Hvidsten i 72. min), Jonas Frøiland Nistad (Sander Kapstad i 79. min), Elias Grimeland (Magne Aarøen i 72. min), Mathias Helgheim

Førde mangla fleire spelarar i troppen grunna russetreff og skader. -Men dei unge erstattarane tok ansvar og sikra oss 2-2 i ein høgdramatisk kamp. Så vi ser på dette som eit vunne poeng, seier Johan Pettersen.

Damelaget til Førde mønstra til bussreisa til Måløy solidarisk i forskjellige drakter i samband med FotballtrøyeFredag til Barnekreftforeningen. Og trenar Johan Pettersen forklarer at samhaldet er den viktigaste grunnen til at det i det heile vart poeng til Førde på Skavøypoll stadion fredag kveld.

Står saman

-Vi spelar kort og godt ein dårleg 1. omgang, og blir samde i pausen om at vi skal gå ut og ta kommandoen dei siste 45 minutta. Og då står vi verkeleg saman som eit lag, og snur kampen då vi går opp i 1-2. Men langt ute i tilleggstida får Måløy eit straffespark, som dei utliknar på, fortel Johan Pettersen og er oppteken av at alle skal ha ros for enorm innsats i denne kampen.

-Det er klart at nokon kan føle seg som ein syndebukk og slikt etter ein slik kamp. Men vi vinn som eit lag og tapar som som eit lag. Og i dag tapte vi heller ikkje, seier Pettersen og rosar dei to unge spelarane Viktoria Zablotna og Kristina Hjelmeland Berqvam etter kampen.

Unge og gode

-Dette er to jenter på 16 og 15 år, og vi skal vere klar over at vi møtte eit robust og vakse Måløy-lag. Då står det respekt av det jentene gjer i dag. Vi må hugse at spelarar som Inga Hoff, Anne Gyldenskog Kilnes, Linnea Levik Aamot, Martine Kvamme og Martine Honningsvåg Aarnes alle ville ha styrka laget vårt viss dei hadde vore med. Men det er lite vi kan gjere med skader og Landstreffet i Stavanger for russen. Derfor er det viktig å framheve dei unge som har erstatta desse fem, seier Johan Pettersen og nemner også at for første gang var dei tre søstrene Hjelmeland Berqvam på bana samstundes.

-Vi har mykje spennande på gang, og uavgjort i denne kampen er å sjå på som sterkt. No har vi tre sigrar og ein uavgjort, og toppar tabellen. Dessutan har vi faktisk spelefri i 3. divisjon fram til 26. mai då vi møter Selje/Åheim på bortebane, avsluttar trenaren og kastar seg i bussen på returen til Førde.

Tekst og foto: Stig Roger Eide

KAMPFAKTA

3.divisjon, kvinner

MÅLØY-FØRDE 2-2 (1-0)

Skavøypoll stadion

100 tilskodarar

Mål:

1-0 17 min Eli Sofie Seim Skjølberg

1-1 81 min sjølvmål

1-2 82 min Vibeke Solheim

2-2 96 min Stine Mårstøl Reite

Førdetroppen: Sofie Honningsvåg Aarnes, Viktoria Zablotna, Inga Hjelmeland Berqvam, Sigrid Welle, Lea Oline Aamot Fonn, Dina Søgnen, Kristina Hjelmeland Berqvam, Helene Vikøren, Kaja Johannessen Skrede, Ragnhild Ulltang, Johanne Støfring, Nora Flatjord Gjelsvik, Marit Hjelmeland Berqvam, Synne Bell Folland, Vibeke Solheim, Andrea Myren Yndestad og Vilde Sunde Wie

Slik stilte Førde-spelarane på trening torsdag kveld. -På denne måten vil vi vise at vi støttar Fotballtrøye-Fredag på 5. mai, seier Øystein Riksheim Østvik.

Bildet over er ikkje Førde sitt lagbilde for 2023-sesongen, men skal vise litt av mangfaldet bak aksjonen som Barnekreftforeningen arrangerer kvart år. På Førde sitt lag ser Førdepatrioten sitt noko utrente fotballauge iallfall drakter frå lag som Manchester United, Roma, Liverpool, Barcelona, Inter, Schalke 04 og sjølvsagt Førde.

Fredag 5. mai er sett av til denne dagen, og både privatpersonar og bedrifter er oppfordra til å stille i fotballdrakt for å vise sin støtte til den livsviktige forskninga som Barnekreftforeningen står bak.

-Frå oss kjem det eit bidrag på 1000 kroner, som vi hentar frå botkassa vår. Det er viktig at også vi tenker på dei som lider av denne sjukdommen. Vi er alle på samme lag i kampen mot barnekreft, seier Øystein Riksheim Østvik og hastar vidare ut på treningsfeltet i Hafstadparken.

PS: Og har DU stålkontroll på internasjonale drakter så legg gjerne inn kva drakter det er snakk om i kommentarfeltet under på Facebook-sida vår.

Tekst og foto: Stig Roger Eide

Damelaget har i 2023-sesongen starta opp ein eigen scoringsklubb, og har fått veldig god respons frå dei som er interessert i damefotball. Under oppgjeret mot Sogndal FK Damer 2 på søndag vart det trekt ut ti vinnarar blant dei som hadde kjøpt andelar i scoringsklubben.

-Vi er svært godt nøgde med responsen på scoringsklubben for denne våren. Vi har totalt seld 300 andelar, og det må vi seie er kort og godt fantastisk. Det viser at det er mange som støttar oss, seier lagleiar Atle Skrede medan han ropar opp vinnarane i pausen på oppgjeret.

Ti vinnarar

-No er det ti personar som får gåvekort på 250 kroner hos vår trufaste sponsor, Chatlet Sport1. Dessutan vil det vanke flaxlodd til den som har tippa riktig tal mål på damelaget gjennom vårsesongen. Og pengane vi får inn på scoringsklubben skal bli brukt til å utvikle damefotballen vidare. Mellom anna har det vore diskutert ei treningsamling etter sesongen, fortel Skrede.

I og med at inndelinga i avdeling til hausten er usikker, så vert denne scoringsklubben avslutta etter vårsesongen.

-Vi kjem sikkert til å gå i gang med tilsvarande til hausten, seier Skrede.

Vinnarane

Men det var dette med vinnarane da.

Følgjande namn vart ropt opp som vinnarar:

Tone Bakke

Lillian Vassbotten

Lina Holsen

Anette Olin Aamot

Solveig Strømmen

Inger Eimhjellen

Siv Flatjord

Otto Kvalen

Åse Johnsen

Stig Roger Eide (ja, du leste riktig. Eg vann eit gåvekort og kjende ikkje til trekninga før namnet mitt vart ropt opp. Viss du lurte altså! )

Tekst og foto: Stig Roger Eide